Bärgfahrer

I bi e Velofahrer. Und letzthin hani mi doch mau glich genauer gachtet, was für eine – auso, i welere Art i überhoupt fahre. Ob schnäu oder langsam, verbisse oder gmüetlech, freudig oder gnärvt. Du hani auso entdeckt, dass es spezieui Eigeschafte git, wo mi aus Velofahrer uszeichne – oder äbä abwärte, je nach Sichtwis natürlech. Wasi wott säge isch: Ig bi e Bärgfahrer. Immer nämlech wenns gradus geit oder nidsi, de schini chum vorwärts zcho, nime miner beide Arme abem Länker, luege ume was aues so passiert um mi, grüesse dHüng, dChatze und dPensionäre und vergisse bau, dass ig ja trotz auem no immer e Velofahrer bi. So wirdi de schliesslech uf dene Gradine o vo aune angere überhout und belächlet. Es macht mer nüt. Wöu es isch äbä so, dass ig, wenn immer i e Berg vor mir gseh, us mim müssige Tagtröimertum erwache, dHäng a Länker setze, miner Bei i Schwung bringe und wie vor Wäspe gstoche dr Bärg ufejage.
Das muess jewils es merkwürdigs Biud si, dä einigermasse plötzlech Wächsu vom gmüetleche Schönwätter-Sunntigsfahrstiu i verbissnig Alp d’Huez-Pantani-Kampfstiu. Jedefaus bini auso e Bärgfahrer. Interessant emu no, dass wiederum die Lüt, wo uf de Gradine ihri voui Chraft isetze, de am Bärg bau blibe stah, sigs, wöu si nüme möge, sigs, wöu si dr Bärg nid liebe. Ig jedefaus liebe dr Bärg. Villech isches aber meh ou dr Gipfu woni liebe, oder äbä ds Gfüu, dobe azcho. Wenn dBei scho langsam weh tüe und me denn aber nach dr letschte Kurve dört ir Färni die letschte Meter u schliesslech dr Übergangspunkt vor Stigig id Abfahrt gseht – da schlahts ds Herz und tanzt schliesslech vouer Zfridäheit, wenns dr Pass erreicht het, dBei chöi entspanne und sech dÜbersüürig langsam us de Muskle dervomacht.
Mängisch hani mi aber de scho gfragt, obs äch nid gschider wär, dChreft besser zverteile, se haub uf de Gradine, haub am Bärg izsetzä. Angerersits fäut villech när genau dChraft wos brucht, um die höchschte Päss derufzcho, um die gröschte Bärge züberquere... Und was chöi, wenn nid die Riese, ds Ziu vomene ehrgizige Bärgfahrer si?